في المسلسل الرائع ” خلي بالك من زيزي “

زميلة تيتو اللي كانت بتتنمر عليها طول الوقت وكانت السبب بشكل أو بآخر في تعقيد الاضطراب النفسي اللي عند تيتو ، الشخصيات ديه ممكن نقابلها كتير في حياتنا ، الناس اللي دايما بتقدم نقد سلبي وتتنمر علي اللي حواليها ، المشكله مش فيهم لاننا مش هنقدر نغيرهم المشكله فينا إحنا وفي ردود أفعالنا تجاه كلماتهم ونقدهم الجارح لينا ،

هل احنا بنقبل الكلام ده ونصدقه عن نفسنا ؟! هل احنا بناخد قيمتنا وصورتنا عن نفسنا من كلام الناس لينا ؟! هل احنا بنسمح ليهم انهم يبثوا سمومهم في حياتنا ويدمرونا ويشعرونا بنظره دونيه عن نفسنا ؟! هل احنا هشين لدرجه ان نسيب اي حد ميعرفناش كويس أو حتي يعرفنا كويس يحطنا تحت عدسه مكبره ونسيبه ينتقد حياتنا طول الوقت ونوفرله بيئه خصبه للتنمر علينا طول ما احنا بنصدقه وبناخد فكرتنا عن نفسنا من كلامه ؟!!

محتاجين يكون عندنا مناعه نفسيه ضد التنمر والكلمات اللي ممكن تجرحك وتعطلك وتديك صوره سلبيه عن نفسك أرفض اي كلام بيقلل ثقتك في نفسك ويشعرك بالسوء تجاه نفسك ، حب نفسك للآخر واقبلها بكل عيوبها مش هيقدر حد يوجعك طول ما انت اصلا مفيش جروح جواك يقدر يدوس عليها ، حافظ علي نفسك ونفسيتك من الأشخاص المتنمرين في حياتك اللي بيأخروك وبيدوك فكره سلبيه عن نفسك ، ارسم حدود لنفسك وامنع اي شخص سلبي أنه يتخطاها ، متديش المتنمر حجم اكبر من حجمه في حياتك ، كلامه مش بيحدد قيمتك ،

انت أكبر من كده بكتيررر … وفي الأغلب المتنمر هو اللي بيكون عنده اضطرابات نفسيه وعدم ثقه بنفسه وبيحاول يبعد الضوء عن ضعفه بأنه يبرز عيوب الآخرين ويتنمر عليهم في محاوله منه لتشتيت الضوء عن عيوبه بإسقاطها علي الآخرين فمتسمحش لحد منهم أنه يمارس اضطرابه النفسي عليك

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد