الساحرة الجزء الاول
الساحرة
أنا مش بس بقدر أتوقع ميعاد موت الناس … أنا كمان باخد فلوس علي كده
زي ما قريتوا كده ، مش بس بقدر أتوقع ميعاد موت الناس ، لا أنا كمان باخد فلوس مقابل ده ، عندي كشك صغير في واحدة من مُدن الملاهي الشعبية اللي مش هذكر إسمها و لا مكانها طبعًا
الكشك ده ورثته من جدتي قبل ما تموت علي طول ، جدتي كانت ساحرة و كانت معروفة بقدراتها الخارقة و كانت مشهورة بإنها بتقدر تتنبئ بميعاد وفاة أي حد من غير ما تغلط
كان عندي 30 سنة لمّا جدتي ماتت ، كنت أقرب حفيدة ليها و كنت الحفيدة اللي إختارتها عشان تورث الكشك و تكمل طريقها من بعدها
كنت مبشتغلش ، مش مرتبطة ، مين هيرتبط بساحرة بتتنبأ بمواعيد موت الناس ؟
أخدت الكشك من جدتي و كملت مسيرتها ، إحنا مش بنشوف مستقبل الناس ، إحنا بنشوف هيموتوا إمتي ، المشكلة الوحيدة إن أنا و جدتي كُنا بنعمل ده بطرق مختلفة عن بعض … تمامًا !
أكيد حد فيكم هيسأل ، مين المجنون اللي هيكون عاوز يعرف ميعاد موته ؟
ساعات كتير بسأل نفسي السؤال ده ، بس هتتفاجؤوا لو عرفتوا أد إيه كم الناس اللي فاكرة الموضوع هزار و تهريج و لعب ، ساعات ناس فضولها بيكون أقوي منها ،
الفضول شعور مدمر ، العدد الأكبر من الناس هو اللي بيكون شاكك أو مش مصدق في قدراتنا الخارقة
لسه فاكرة اليوم اللي تنبأت فيه بأول ميعاد موت ليّا ، راجل طويل في أواخر التلاتينات من عمره دخل الكُشك بتاعي ، كان بيتفرج علي كل حاجة بسخرية و إتهزاء بطريقة ضايقتني