الجمعة , سبتمبر 25 2020

ليالى الكنز الجزء الخامس

بقيت مرعوبة جوه الاوضة وخايفة بابا ياخد باله مني ، خالد خرجله بسرعة وقفل الباب وراه وتابعتهم انا من خرم الباب ، بابا وقف قصاد خالد وقاله:

= ايه حكايتك مع سمر؟ امها كانت هتقتلها وتقتل جوزها والبنت بتقول انها كانت بتشوفك انت مش بتشوف ابوها

.. ازاى؟!! اكيد بتقول اى كلام طبعًا ، انا مفيش بيني وبينها كلام اساسًا ، ده حتى لما بشوفها صدفة وانا نازل من البيت احيانًا بقولها صباح الخير واوقات كتير لا ، وزى ماحضرتك عارف انا بقالى فترة صغيرة جدًا فى البيت ، يعنى اكيد مأثرتش عليها ولا على اى حد بالشكل ده

= ماهو المشكلة الحقيقية ياخالد ان كل الكلام ده حصل لما انت رجعت المنطقة من جديد ، عمرنا ماسمعنا عن الموضوع ده قبل كده

.. قصد حضرتك ايه؟

= قصدى انك لو جاى المنطقة تلعب ببنات الناس وتخليهم يحبوك وكمان توصل بيهم المرحلة انهم يتخيلوك فى ابوهم يبقى بلاش منها وتسيب المنطقة ، احنا كلنا عندنا بنات ومش هنقبل ان يحصل معانا حاجة زى كده

.. طب انا هعتبر كلام حضرتك صح وانها بتحبنى وبتتخيلنى ، طب وابوها ليه مافوقهاش ؟! ليه نام معاها وكمل الحكاية ؟! الموضوع مش انا خالص ، الموضوع هما ،
هما اللى بيعملوا الغلط وبيرموه على غيرهم وبيبقى بمزاجهم ، بس لازم الاعذار والحجج ، اللى انا اعرفه ان اللى يغلط يتحمل نتيجة غلطته ، لكن ميرميش الناس بكلام محصلش

= عموما ياخالد ، كل اللى اقدر اقولهولك لو عايز تعيش بنا خليك فى حالك ، وملكش دعوة ببنات المنطقة ، لو عينك على واحدة ممكن نجوزهالك واهو هنكون بنسعى فى الخير ، لكن لعب لا ، مش هسمح بيه
ومحدش فى المنطقة كلها هيسمح بيه ، ومجيتى هنا اكراما لامك وابوك الله يرحمهم

بابا مشي بعد ماحذر خالد وانا مبقتش عارفة اتصرف ازاى والموضوع بيتعقد يوم عن يوم ، وكده بابا من المستحيل انه يوافق على خالد خاصة بعد ماحصل الموضوع ده ، انا نزلت بسرعة علشان محدش ياخد باله وسط الدوشة وقولت كمان ادى لنفسي فرصة افكر قبل مااغلط غلطة كبيرة اندم عليها.

بعد تفكير طويل خدت قرار انى متكلمش مع خالد تانى واحاول ابعد عنه بقدر الامكان ، وكمان ادى لنفسي فرصة انى انساه وافكر فى واحد تانى وحمدت ربنا ان محصلش بنا حاجة يوم ماكنت عنده فى الشقة ، عدى شهور وكنت بشوفه تخاطيف ، قضيتها كلها من البيت للجامعة ومن الجامعة للبيت ولو بخرج مع صحابي بيكون قليل اوى .

انا مجنونة وبحب المغامرات وكمان دراستى فى الجامعة لمادة التاريخ اللى انا بعشقها ، خلانى اتلهيت وسط كتب كتير اوى ليها علاقة بالعصور الوسطى والعصور القديمة ، وصادفنى حكاية غريبة جدًا عن كنز مدفون تحت الارض من العصور الوسطى ، بعد عوامل التعرية ممكن يكون على بُعد 30 متر تحت الارض ومش فى مكان واحد يعنى الكنز كبير وموجود لكن متوزع على كذا مكان .

الدكتور بتاع المادة بتاعتنا طلب مننا نعمل بحث عن موضوع الكنز ده ونحاول نجمع اكتر مصادر تخصه ، بصراحة حسيت من كلامه انه عايز يستغلنا فى جمع المعلومات ويبتدى هو شغل عليه ويحاول يخرجه ، وعلشان كده اتفقت انا وزمايلي اللى معايا اننا نديله المعلومات ناقصة وكمان اهم حاجة نديله المكان غلط.

الجروب بتاعنا كان من 3 اشخاص انا وفاطمة وحسام ، حسام كان بيلمحلى انه معجب بيا لكن انا مكنش عندى استعداد احب حد بعد موضوع خالد وكنت محتاجة هُدنة كبيرة وكمان موضوع البحث والكنز قلبولى دماغى وخلونى مبفكرش فى حاجة غير فيهم.

اتلهينا شوية عن موضوع البحث لان اختى قمر اتخطبت لمحمود زميلي فى الجامعة وكانت تحضيرات الخطوبة بتاعتها كتير ، محمود انسان كويس وهي فرحانة جدًا بيه وكمان بابا وماما مبسوطين منه ومن وجوده وسطينا ، حسام زميلي فى الجروب كان من الوقت للتانى بيتصل بيا يطمن عليا لكن على غير العادة لقيت حسام بيكلمنى بليل متأخر على التليفون ، وقالى:

= لو وافقتى تتجوزيني ، انا هقولك على مكان الكنز ……

يتبع …

ليالى الكنز الجزء السادس